Kan iai long ka jingrakhe kynmaw burom kaban sah kynmaw pateng la pateng ha ka history jong ka Balang Presbyterian ha Ri Khasi Jaintia, ha kaba da ki lak ngut ki paidbah na kylleng ka ri ki la poi sha kane ka jingrakhe dap 175 snem ka jingwan ka Gospel ha kine ki lum kaba la long ha ka Balang Nongsawlia.
Ia kane ka jingrakhe la pynlong ha Nongsawlia naduh ka 18 tarik u Naiwieng bad kut ha ka 20 tarik. Ha ka sngi ba sdang la ioh jingrwai na ka Balang Presbyterian Mawmluh bad kumjuh ruh ka jingrwai pdiang na ka Balang Presbyterian Nongsawlia bad ka jingkren pdiang da u Rev RF Kharkrang, Pastor Incharge jong ka Balang.
Ia kane ka jingrakhe la plie ha ka 19 tarik ha kaba u Moderator jong ka KJP Assembly u Rev S. Thawmuit u la plie ia kane ka jingrakhe ha ka jingiaseng kaba la long ha phyllaw ka Iingmane. Ha ka jingiaseng plie la ioh ruh ia ka jingkren lamphrang da u Senior Administrative Secretary ka KJP Assembly, u Rev NS Phawa. Kiwei pat ki prokram ha kane ka jingiaseng ki long ka jingpyllait ia ka Souvenir da u Moderator ka PCI, u Rev. Laldawngliana bad kumjuh ruh ka jingpyllait ia ka Documentary Film. Kawei pat ka prokram sah kynmaw ha kane ka jingrakhe kadei ka jingplie ia u motdur jong ne u Bust u Thomas Jones da u Rev. Hydel Edwards, u nongmihkhmat ka Balang kmie na Wales. Une u mot u don ha phyllaw jong ka Sydney Evan House kaba long ka iing ba la tei naduh ka por ki Missionary. Ia kane ka jingiaseng plie la pyniaid da u Moderator ka KJPA, u Rev. Thawmuit. Ha kane ka jingiaseng la ioh ruh ia ka jingkren kyrkhu kyrdoh na ka Presbyterian Churh of Wales, Presbyterian Church of India, Sylhet Presbyterian Synod,National Council of Churches in India, North East India Christian Council bad St. Andrew Church na Kolkata.
Lehse kane ka jingrakhe kan iai sah kynmaw pateng la pateng ha ka sngi kaba kut jong ka Jubili, kata ha ka 20 tarik, ha kaba da ki lak ngut ki paidbah na kylleng ka Ri Khasi Jaintia ki la poi ban iakmen lang ha kane ka sngi kaba khraw ban kynmaw ia ka jingleh phylla u Blei haba u la phah ia u Thomas Jones bad kiwei pat ki shakri ban pynim bad pynshait ia kane ka ri 175 snem mynshuwa. Ha kane ka jingiaseng la wan pynshngain lang da ki nongmihkhmat na ka Balang kmie na Wales, nangta na ki nongmihkhmat ka Presbyterian Sylhet Synod, Presbyterian Church of India, National Council of Churches in India, u Myntri Rangbah ka jylla, u Dr. Mukul Sangma bad katto katne ki Myntri ka sorkar jong u. U nongkren ba kham kongsan ha kane ka jingiaseng udei u Rev. Dr. RR Cunville bad kumjuh ruh u Rev. Watcyn James, jong ka Balang kmie na ri Wales.
U Rev James haba iakmen lang ba ki paid Khasi halor kane ka jingdap 175 snem ka Balang, u la maham ia ka Balang hangne ia kaei kaba la jia ha ka Balang kmie ha Wales, ha kaba mynta ka la tlot. U la ong ba ka ki don ki daw jong ka jingtlot bad kawei na kine kadei ka jingphaidien ia kaei kaba la jia mynshuwa bad kaba rim bad ki shu sngewhun tang hangta bad ki klet noh ia kaei kaba dei ban leh shakhmat. “Nga kmen ban iohi iaphi katne u paidlang ba la siewspah jong U Blei, hynrei ngi sha Wales pat mynta ngi la tlot”, la ong u Pastor James. Hynrei ka daw kaba kongsan kaba lah ban pyntlot ia ka Balang, kadei namar ba ka la klet noh ia U Jisu, uba long u nongseng jong ka.
U Rev. Dr. Cunville ha ka khubor jong u, u la ong ba u Thomas Jones udei u shakri U Blei uba la wan ban ialap ia ka jingshakri ha ka liang ka met bad ka mynsiem. “U Thomas Jones udei u shakri jong U Blei uba la ong, “Ma nga bad ka iing jong nga, ngan shakri ia U Trai”
Choir Balang Mawmluh
Choir Balang Mawpat 175ngut
Choir Balang Nongsawlia KI Nongpdiang bad ka Balang Kmie
Jingplie ia U Motdur jong U Thomas Jones
Ka Kmie ba bah bad la i Khun ba wan sha ka Jingrakhe
Haba seng nongrim ia ka khubor na ka Kitab u Joshuwa ka lynnong kaba 24 ka dkhot ba 14, u la khot ia ki paid riewngeit ba kin rai ban shakri ia U Blei UBa im bad uba shisha, ym ban shakri ia ki blei jong ka pyrthei. Ki blei jong kane ka pyrthei ba ki briew ki mane ki long ka jingkwaj brai ka don ka jingawria, ka jingkhan myntoi bad kiwei kiwei kiba ka pyrthei ka tyrwa. U la ong ruh ba ia ka Gospel la ialap mynta la 175 snem haduh mynta kam pat rim bad ka dang iai long kajuh haduh mynta. Ia kane ka jingiaseng baroh shi sngi la pyniaid da u Moderator ka KJP Assemly, u Rev. S.Thawmuit.
