Ka Urban Mission jong ka Khasi Jaintia Presbyterian Synod Sepngi, ha ka 31 July, 2018, ka la ioh ban plie ia ka Counselling Centre ha Mawlai Nonglum, ka iing kaba don ha syndah ka Iing Mane Presbyterian Nonglum. Ha katei ka sngi, la ialam ia ka Service da Rev.B.Syiem, Chairman ka Urban Mission Committee bad la pule & duwai da Mr.S.S.Marbaniang, Counsellor ka Urban Mission. La ioh ruh ka jingkren na ka liang ka Balang Presbyterian Mawlai kiba long ki trai jong ka iing, da Rev.Donald Langstieh bad na ka K.J.P.Synod Sepngi da Rev.K.B.Snaitang, Executive Secretary, I/c Mission Evangelism Department. U Rev.L.Nongsiej, Chairman ka Mission Evangelism Department jong ka Synod, u la duwai pynkyntang ia ka Centre bad u Rev.N.M.Iangrai, Director ka Urban Mission ka Synod, u la ai ka jingkren ai khublei bad la duwai da u Rev.A.Rymmai. Ha katei ka sngi la ia don ryngkat ki nongmih khmat na ka Balang Presbyterian Mawlai, ka Balang Presbyterian Phudmuri bad ka Balang Nonglum, ki client kiba ju wan sha ka counselling ka Urban Mission, lem bad ki staff ka Urban Mission ka K.J.P.Synod Sepngi.
Kane ka counselling centre ka pdiang sngewbha ia baroh ki para mynsiem kiba kordor khlem da khein la ki wan na kano kano ka kynhun Balang ne kynhun niam, kiba donkam ia ka jingiasyllok kyrpang ha kaba ia dei bad ki jingeh shimet, ki jingeh ha iing, ka jingkyrni (Addiction) ha ki jingmlien basniew kum ka jingdih buaid bad kiwei kiwei bad kiwei kiwei ki jingiashem ki jingiakhynduh. Kane ka counselling centre ka plie ar sien shitaiew, kata, ha ka Sngi Ba-ar (Tuesday) bad Sngi Thohdieng (Friday), naduh ka por 5:00PM haduh 8:00PM. Ki Counsellor ba la pynbeit kyrpang ha kane ka centre ki long, Mr.S.S.Marbaniang (Bah Shem) bad Miss.Nandaris Marwein.
.
